كلام متأخر أتمنى أن يكون له معنى ولو مالوش اعتبره هذيان من واحد مخرف مش اكتر

 انا هاقول حاجة و اطلع اجري لأن التفكير بحرية والوصول لرأي مخالف بقى جريمة في الجو اللي احنا فيه دة شوية نقاط في صورة مقدمات ونتائج: 

1- الجيش مش ثوري 

2- هدفه من الأول انقاذ البلد فقط ومالوش غرض لا في الحكم و لا حتى في القضاء ع الفساد أو محاولة الإصلاح 

3- عشان كدة أما لقى البلد هتخرب قام نحى مبارك وقال هاقعد 6 شهور بس المفروش كانوا هيخلصوا في سبتمبر عشان انقل السلطة وانتو اتصرفوا مع بعض 

4- الأصوات العالية في الثوار واللي في العادة بتوجه الجموع راسها وألف سيف تشرك الجيش في ثورتها ودة بيؤدي لحاجات كتير ظاهريا فقط في صالح اثورة لكن مساوئها أقل منها طول الفترة الانتقالية - ادينا لسة في سبتمبر هيا دوب هانعمل انتخابات البرلمان و يا عالم  الرئاسة امتى ودة في حين ان المواطن العادي كل اللي سايفه ان مصالح البلد واقفة وكيلو القوطة بتسعة جنيه والزيت غلى ربع تمنه ويادوب بس للحظة بس بيفرح بـ"إنجاز" من إنجازات الثورة ثم سيسب و يلعن سنسفيل المظاهرات و الاعتصامات أما يمر من الميدان أو ماسبيرو 

5- ترتيب أولويات الثورة كان يقتضي مساعدة الجيش في الإسراع بالمرور من الفترة الانتقالية و تسليم السلطة بالصورة التي يراها عن طريق انتخابات تعكس الإرادة الشعبية التي صارت واعية وليس عن طريق مجلس رئاسي معين من شوية مثقفين و رموز بيختلفوا و يتخانقوا مع بعض طول عمرهم اكتر ما بيتجمعوا على كلمة 

6- الاكتفاء بالتحفظ على أموال كل رموز الفساد ووضعهم تحت إقامة جبرية مشددة وترك القضاء الطبيعي يأخذ مجراه - مش محاكم ثورية عسكرية يطالب بها الآن ناصريون جدد 

7- عن اولويات المرحلة برضه كان علاء سيف كاتب كلام هنا اتفق معاه فيه وفي باقي المدونة برضه موضوع تاني بيرد على مخاوف اللي بيبصوا للشعب نظرة نظيف و عمر سليمان!http://manalaa.net/node/88038   أخيرا أتمنى أن أكون مخطئا وأن يكون الصواب هو الطرق على الحديد و هو ساخن وإكمال الثورة في حموتها وتحقيق جميع ما كنا نحلم به في نفس اللحظة ولكن بلال فضل كاتب كلام بيقارن فيه بين الوضع الحالي وأجواء ما بعج ثورة 1919 أتمنى ألا نصل إليه وإن كانت ارهاصاته في الأفق للأسف